اسلام آباد میں کشمیر ڈے واک، ٹریفک اور پارکنگ پلان جاری

اسلام آباد: ٹریفک پولیس نے 27 اکتوبر کو کشمیر ڈے واک کے موقع پر ٹریفک کی روانی برقرار رکھنے کے لیے متبادل راستوں اور پارکنگ کا منصوبہ جاری کردیا ہے۔

پولیس کے مطابق ٹریفک انتظامات صبح 7 بجے سے واک کے اختتام تک نافذ رہیں گے۔ اس دوران مختلف شاہراہوں پر ٹریفک کا رخ تبدیل کیا جائے گا۔

شاہراہِ جمہوریت پر سیکرٹریٹ سے فرانس ٹرن تک ٹریفک متبادل راستے پر منتقل ہوگی۔ شہریوں کو اس دوران مارگلہ روڈ استعمال کرنے کا مشورہ دیا گیا ہے۔

ڈھوکڑی چوک، سرینا ہوٹل سے فرانس ٹرن تک آمدورفت متاثر ہونے کی صورت میں ایمبیسی روڈ اور اتاترک روڈ استعمال کیے جاسکیں گے۔ شمس پکٹ سے ریڈیو پاکستان تک ٹریفک کا رخ تبدیل ہوگا، جس کے لیے بری امام اور تھرڈ ایونیو متبادل راستے ہوں گے۔

ایف بی آر چوک اور وحید شہید چوک سے سیکرٹریٹ کی جانب آنے والی ٹریفک کو بھی متبادل راستوں پر منتقل کیا جائے گا۔ نادرا ہیڈکوارٹر سے ریڈیو پاکستان چوک تک ٹریفک متاثر ہونے پر شہری جناح ایونیو اور مارگلہ روڈ استعمال کرسکیں گے۔

ٹریفک پولیس کے مطابق واک میں شریک اہم شخصیات کی گاڑیوں کے لیے ڈی چوک پریڈ گراؤنڈ جبکہ دیگر شرکا کے لیے نیشنل لائبریری میں پارکنگ مختص کی گئی ہے۔

چیف ٹریفک آفیسر کائنات اظہر خان نے شہریوں کو ٹریفک کی تازہ صورتحال کے لیے ایف ایم 92.4 اور اسلام آباد ٹریفک پولیس کے سرکاری سوشل میڈیا صفحات سے رہنمائی لینے کا مشورہ دیا ہے۔