ممبئی کی تقریب میں انوشکا کا روایتی انداز، ویرات کوہلی کی سادہ لباس میں شرکت

ممبئی: بھارتی اداکارہ انوشکا شرما اور ان کے شوہر، کرکٹر ویرات کوہلی نے امریکی گلوکار کرشنا داس کی مذہبی موسیقی کی محفل میں شرکت کی، جہاں دونوں کے لباس اور انداز نے توجہ حاصل کی۔

25 اکتوبر کو ممبئی کے علاقے ورلی میں منعقدہ تقریب میں انوشکا نے گلابی رنگ کا انارکلی سوٹ پہنا۔ گول گلے اور پوری آستینوں والے لباس کے ساتھ انہوں نے اسی رنگ کا پاجامہ اور چاندی کے رنگ کی کڑھائی والا دوپٹہ لیا تھا۔

اداکارہ نے لباس کے ساتھ موتیوں کا ہار، سونے کی بالیاں، انگوٹھیاں اور کولہاپوری چپل کا انتخاب کیا۔ ہلکے میک اپ اور کھلے بالوں نے ان کے روایتی انداز کو مکمل کیا۔

دوسری جانب ویرات کوہلی سیاہ ٹی شرٹ اور سفید پتلون میں تقریب میں شریک ہوئے۔

سوشل میڈیا پر سامنے آنے والی ویڈیوز میں دونوں ساتھ بیٹھے پرفارمنس سنتے نظر آئے۔ انوشکا موسیقی کے ساتھ تالیاں بجاتی اور مذہبی کلام دہراتی بھی دکھائی دیں۔

یہ محفل کرشنا داس کے بھارت کے دورے کا حصہ تھی۔ امریکی گلوکار روایتی بھارتی مذہبی کلام کو مغربی موسیقی کے انداز کے ساتھ پیش کرنے کے لیے جانے جاتے ہیں۔

انوشکا اور ویرات اس سے پہلے بھی کرشنا داس کی محفلوں میں شرکت کرچکے ہیں۔ دونوں کی شادی دسمبر 2017 میں اٹلی میں ہوئی تھی اور ان کے دو بچے ہیں۔