ریڈیو پاکستان حملہ کیس، سہیل آفریدی سمیت 5 ملزمان کے خلاف چالان جمع
کامران بنگش اور تیمور سلیم جھگڑا بھی نامزد، ملزمان کے وارنٹ گرفتاری جاری ہوں گے، عدالت
پشاور: پشاور میں 9 مئی کو ریڈیو پاکستان حملہ کیس میں سہیل آفریدی، سابق صوبائی وزیر کامران بنگش، تیمور جھگڑا سمیت 5 ملزمان کے خلاف چالان جمع کرادیا گیا۔
پبلک پراسیکیوٹر نے انسداد دہشت گردی عدالت میں 9 مئی کو ریڈیو پاکستان حملہ کیس میں پولیس کا چالان جمع کروادیا، چالان میں سہیل آفریدی، کامران بنگش اور تیمور سلیم جھگڑا سمیت دیگر نامزد ہیں۔
عدالت نے قرار دیا کہ کیس میں چالان جمع ہوگیا، ملزمان نامزد ہوگئے، کیس میں اب ملزمان کے خلاف وارنٹ گرفتاری جاری ہوں گے۔
چالان کے مطابق ریڈیو پاکستان کی درخواست پر عدالت نے نادرا اور پنجاب فرانزک سے ملزمان کی شناختی تصدیق کروائی، دونوں رپورٹس میں ملزمان کی حملہ کیس میں موجودگی کی تصدیق ہوئی۔
پولیس رپورٹ کے مطابق فرانزک رپورٹ کی روشنی میں سہیل آفریدی کی ریڈیو پاکستان حملے کے مقام پر موجودگی کی تصدیق ہوئی ہے۔ رپورٹ میں تیمور سلیم جھگڑا اور کامران بنگش کی بھی ریڈیو پاکستان حملے کے مقام پر موجودگی کی تصدیق کا کہا گیا ہے۔
