انگور اڈہ پر گولہ باری، شہری شہید؛ جوابی کارروائی میں افغان چوکیاں تباہ

اسلام آباد: جنوبی وزیرستان کے علاقے انگور اڈہ میں سرحد پار سے گولہ باری کے نتیجے میں ایک شہری شہید اور پانچ افراد زخمی ہوگئے۔ سکیورٹی ذرائع کے مطابق پاکستانی فورسز نے جوابی کارروائی میں افغان طالبان کی متعدد چوکیاں تباہ کردیں۔

لوئر جنوبی وزیرستان کے ڈپٹی کمشنر کے مطابق افغان طالبان فورسز نے انگور اڈہ بازار اور قریبی رہائشی علاقوں پر بلااشتعال فائرنگ کی۔ مارٹر گولہ گرنے سے جانی نقصان ہوا، جبکہ متعدد دکانوں کو بھی نقصان پہنچا۔ زخمی پانچوں افراد کا تعلق ایک ہی خاندان سے بتایا گیا ہے۔

سکیورٹی ذرائع نے بتایا کہ پاک فوج نے فوری جوابی کارروائی کی اور اہلکار مزید کسی بھی جارحیت کا جواب دینے کے لیے تیار ہیں۔

گورنر خیبرپختونخوا فیصل کریم کنڈی نے شہری آبادی پر حملے کی مذمت کرتے ہوئے کہا کہ پاکستان اپنے شہریوں پر حملے اور خودمختاری کی خلاف ورزی برداشت نہیں کرے گا۔ انہوں نے کہا کہ ملکی دفاع کے لیے مسلح افواج کو پوری قوم کی حمایت حاصل ہے۔