عبادت کے دوران پادری کے ساتھ افسوسناک حادثہ، ویڈیو سوشل میڈیا پر وائرل

ایکواڈور کے شہر گوایاکیل میں چرچ کے اندر عبادت کے دوران پیش آنے والے افسوسناک حادثے میں 53 سالہ پادری جان کی بازی ہار گئے۔ واقعہ اس وقت پیش آیا جب عبادت کی تقریب انٹرنیٹ پر براہِ راست نشر کی جارہی تھی اور پادری کے پیچھے نصب لکڑی کی بھاری صلیب اچانک ان کے سر پر آگری۔

بین الاقوامی خبر رساں اداروں کے مطابق حادثہ ہفتہ 17 اکتوبر کو گوایاکیل کے چرچ آف آور لیڈی آف پرپیچوئل ہیلپ میں پیش آیا، جہاں پادری پیٹریسیو الفریڈو سانچیز مولیناری عبادت کی قیادت کررہے تھے۔

سوشل میڈیا پر گردش کرنے والی ویڈیو میں دیکھا جاسکتا ہے کہ پادری عبادت گزاروں کی جانب رخ کیے کھڑے تھے کہ ان کے پیچھے دیوار پر نصب بڑی صلیب اچانک آگے کی طرف گری اور ان کے سر سے ٹکرا گئی۔ پادری فوراً نیچے گرگئے جبکہ چرچ میں موجود افراد گھبرا کر ان کی مدد کے لیے آگے بڑھے۔

ویڈیو میں عبادت گزاروں کی آوازیں بھی سنائی دیتی ہیں جو پادری کو پکار رہے تھے اور ایمبولینس بلانے کی درخواست کررہے تھے۔ کچھ ہی دیر بعد عبادت کی براہِ راست نشریات بند کردی گئیں۔

رپورٹس کے مطابق امدادی عملے کو فوری طور پر طلب کیا گیا، تاہم پادری کی جان نہیں بچائی جاسکی۔ بعدازاں چرچ کی انتظامیہ نے واقعے کی تصدیق کرتے ہوئے ان کی وفات کا اعلان کردیا۔

گوایاکیل کے آرچ ڈائیوسیز کی جانب سے جاری بیان میں پادری پیٹریسیو الفریڈو سانچیز مولیناری کی وفات پر گہرے دکھ اور افسوس کا اظہار کیا گیا۔ چرچ انتظامیہ نے مرحوم کے اہل خانہ، ساتھی پادریوں اور ان سے عقیدت رکھنے والے افراد سے تعزیت کی۔

پادری مولیناری کا تعلق رومن کیتھولک مذہبی جماعت کانگریگیشن آف دی موسٹ ہولی ریڈیمر سے تھا، جسے ریڈیمپٹورسٹس بھی کہا جاتا ہے۔ وہ گوایاکیل میں مذہبی خدمات انجام دے رہے تھے اور اس سے قبل دیگر علاقوں میں بھی چرچ کی ذمہ داریاں نبھا چکے تھے۔

واقعے کے بعد حادثے کی ویڈیو سوشل میڈیا پر تیزی سے پھیل گئی۔ متعدد صارفین نے پادری کی اچانک وفات پر افسوس کا اظہار کیا، جبکہ چرچ سے وابستہ افراد نے انہیں خراجِ عقیدت پیش کیا۔

بین الاقوامی میڈیا کے مطابق پادری نے حادثے سے کچھ دیر قبل اپنے خطاب میں زندگی کی عارضی نوعیت کا ذکر کیا تھا اور عبادت گزاروں کو اپنے اہل خانہ اور مذہبی زندگی کے لیے وقت نکالنے کی تلقین کی تھی۔

اتوار 18 اکتوبر کو چرچ میں مرحوم پادری کی یاد میں خصوصی مذہبی تقریب منعقد کی گئی، جس کی قیادت گوایاکیل کے آرچ بشپ کارڈینل لوئس کیبریرا نے کی۔ اس موقع پر پادری کی خدمات کو یاد کیا گیا اور ان کے لیے دعائیں کی گئیں۔

چرچ انتظامیہ نے دنیا بھر سے موصول ہونے والے تعزیتی پیغامات پر شکریہ ادا کرتے ہوئے مرحوم کی روح کے ابدی سکون کے لیے دعاؤں کی درخواست بھی کی۔

تاحال یہ واضح نہیں ہوسکا کہ دیوار پر نصب بھاری صلیب اچانک کیسے گری۔ دستیاب رپورٹس میں صلیب کی تنصیب یا عمارت کی ساخت میں کسی مخصوص خرابی کی سرکاری تصدیق سامنے نہیں آئی۔ مقامی حکام کی جانب سے بھی حادثے کی وجوہات کے بارے میں کوئی حتمی مؤقف جاری نہیں کیا گیا۔