پی ایس ایل 12 کی تیاریوں میں تیزی، کھلاڑیوں کی نیلامی کی تاریخ طے

لاہور: پاکستان سپر لیگ کے بارہویں ایڈیشن کے لیے کھلاڑیوں کی نیلامی 23 جنوری 2027 کو ہوگی۔ پاکستان کرکٹ بورڈ نے ٹیموں کی تشکیل کے مراحل کا اعلان کرتے ہوئے کھلاڑیوں سے براہ راست معاہدوں کا مرحلہ بھی کھول دیا ہے۔

یہ تازہ اعلان پی ایس ایل گورننگ کونسل کے آن لائن اجلاس کے بعد سامنے آیا ہے۔ چیئرمین پی سی بی محسن نقوی کی زیر صدارت اجلاس میں آئندہ سیزن کے شیڈول، کھلاڑیوں کے معاہدوں اور مالی معاملات پر غور کیا گیا تھا۔

اجلاس سے متعلق ابتدائی رپورٹ میں 23 جنوری کو نیلامی کرانے کی تجویز دی گئی تھی، جس کی اب پی سی بی نے تصدیق کردی ہے۔ تاہم نیلامی بیرون ملک کرانے کی تجویز پر اجلاس میں حتمی فیصلہ نہیں ہوسکا تھا۔

پی ایس ایل 12 کا انعقاد 18 مارچ سے 2 مئی 2027 تک ہوگا اور آٹھ ٹیمیں حصہ لیں گی۔ ٹورنامنٹ کی یہ تاریخیں پی سی بی نے 8 اکتوبر کو جاری کردہ اعلان میں طے کردی تھیں۔

ایکسپریس کی رپورٹ کے مطابق اجلاس میں فیصلہ کیا گیا کہ 3 سے 11 اپریل تک پاکستان میں ساؤتھ ایشین گیمز کے دوران لاہور اور راولپنڈی میں پی ایس ایل کے میچز نہیں رکھے جائیں گے۔ میچز کے مکمل شیڈول کا اعلان باہمی مشاورت کے بعد کیا جائے گا۔

فائنل اور اختتامی تقریب لاہور میں کرانے کا امکان بھی ظاہر کیا گیا، تاہم اس حوالے سے حتمی اعلان سامنے نہیں آیا۔

اجلاس میں ٹیموں کو موجودہ کھلاڑی برقرار رکھنے کی اجازت اور براہ راست معاہدوں سے متعلق تجاویز کا بھی جائزہ لیا گیا۔ اس کے علاوہ آئندہ سیزن سے ٹیم مالکان کی تاخیر سے ادائیگیوں پر اضافی رقم وصول کرنے کا سلسلہ ختم کرنے کا فیصلہ کیا گیا۔

اسلام آباد یونائیٹڈ کے مالک علی نقوی نے اجلاس کو مثبت قرار دیتے ہوئے کہا کہ مالی اور انتظامی معاملات پر اہم فیصلے ہوئے ہیں۔