کوئٹہ طیارہ حادثے میں دو پائلٹس کی شہادت، وزیراعلیٰ سرفراز بگٹی کا اظہارِ افسوس
میر سرفراز بگٹی نے میجر حسنین شہزاد ہمایوں اور کیپٹن عبدالصمد کی شہادت کو قومی نقصان قرار دیتے ہوئے سوگوار خاندانوں سے دلی تعزیت اور ہمدردی کا اظہار کیا۔
کوئٹہ: وزیراعلیٰ بلوچستان میر سرفراز بگٹی نے کوئٹہ میں پاک فوج کے تربیتی طیارے کو پیش آنے والے حادثے میں دو پائلٹس کی شہادت پر گہرے دکھ اور افسوس کا اظہار کرتے ہوئے شہداء کے اہل خانہ سے دلی تعزیت کی ہے۔
وزیراعلیٰ بلوچستان نے شہید میجر حسنین شہزاد ہمایوں اور شہید کیپٹن عبدالصمد کی شہادت پر رنج و غم کا اظہار کرتے ہوئے کہا کہ دونوں پائلٹس کی شہادت ایک قومی نقصان ہے۔
میر سرفراز بگٹی نے اپنے تعزیتی بیان میں کہا کہ دکھ کی اس گھڑی میں صوبائی حکومت اور بلوچستان کے عوام سوگوار خاندانوں کے غم میں برابر کے شریک ہیں۔
انہوں نے شہداء کے اہل خانہ سے دلی ہمدردی کا اظہار کرتے ہوئے کہا کہ ان کے پیاروں کی جدائی کا دکھ نہایت گہرا ہے اور اس مشکل وقت میں متاثرہ خاندانوں کے ساتھ مکمل یکجہتی کا اظہار کرتے ہیں۔
وزیراعلیٰ بلوچستان نے اللہ تعالیٰ سے دعا کی کہ شہید میجر حسنین شہزاد ہمایوں اور شہید کیپٹن عبدالصمد کے درجات بلند فرمائے، انہیں جنت الفردوس میں اعلیٰ مقام عطا کرے اور لواحقین کو صبرِ جمیل عطا فرمائے۔
وزیراعلیٰ کے جاری کردہ بیان میں حادثے کی وجوہات یا تحقیقات سے متعلق مزید تفصیلات فراہم نہیں کی گئیں۔
