کوئٹہ میں ہنر سے روزگار کی جانب قدم، نوجوانوں کی فنی تربیت شروع

کوئٹہ: بلوچستان حکومت نے نوجوانوں کو پیشہ ورانہ ہنر سکھانے کے لیے کوئٹہ میں یوتھ ووکیشنل اسکلز ٹریننگ پروگرام کا باقاعدہ آغاز کردیا ہے۔ پروگرام کا مقصد نوجوانوں کے لیے روزگار کے مواقع بہتر بنانا اور انہیں معاشی طور پر خودمختار ہونے میں مدد دینا ہے۔

اس پروگرام کے تحت نوجوانوں، خصوصاً خواتین کو صنعتوں کی موجودہ ضروریات کے مطابق فنی تربیت دی جارہی ہے، تاکہ وہ ملازمت حاصل کرسکیں یا اپنا کام شروع کرنے کے قابل ہوسکیں۔

اس وقت 240 سے زائد طالبات بیوٹی سروسز، ہاتھ کی کڑھائی اور دیگر پیشہ ورانہ مہارتوں کے کورسز میں زیرِ تربیت ہیں۔

کورسز میں عملی تربیت پر خصوصی توجہ دی جارہی ہے، تاکہ شرکا تربیت مکمل کرنے کے بعد اپنے ہنر کو روزگار یا چھوٹے کاروبار کے لیے استعمال کرسکیں۔

صوبائی حکومت نے پروگرام کے تحت کوئٹہ میں 720 سے زیادہ نوجوانوں کو فنی اور پیشہ ورانہ تربیت فراہم کرنے کا ہدف مقرر کیا ہے۔