جامعہ تربت میں نومبر میں کیچ اکیڈمک گالا ہوگا، علمی و تخلیقی مقابلوں کی تیاری

تربت: جامعہ تربت کے مرکزی کیمپس میں نومبر کے دوران ’’کیچ اکیڈمک گالا 2026‘‘ منعقد کیا جائے گا۔ اس میں طلبہ اور نوجوانوں کو علمی، تخلیقی، تکنیکی، ثقافتی اور تفریحی سرگرمیوں کے ذریعے اپنی صلاحیتیں پیش کرنے کے مواقع ملیں گے۔

گالا کا اہتمام جامعہ کے تعلیمی و انتظامی شعبوں، طلبہ کلبز اور سوسائٹیز کے اشتراک سے کیا جارہا ہے۔ اس کا مقصد نوجوانوں کو نئے خیالات پیش کرنے، تخلیقی صلاحیتیں نکھارنے اور نئی مہارتیں سیکھنے کا موقع دینا ہے۔ پروگرام جامعہ کے اسٹریٹجک پلان 2026 تا 2030 کا حصہ ہے۔

سرگرمیوں میں کاروباری آئیڈیاز کے مقابلے، کیریئر رہنمائی اور کاروبار شروع کرنے کے تربیتی کیمپ، بزنس گالا اور مصنوعی ذہانت کی تربیت شامل ہوگی۔ ٹیکنالوجی، سائنس، آرٹ اور جدت کے مقابلوں کے ساتھ ڈرامہ، شاعری، موسیقی کے نئے ٹیلنٹ کی تلاش اور کھیلوں کے پروگرام بھی ہوں گے۔

جامعہ کے ترجمان کے مطابق گالا وائس چانسلر پروفیسر ڈاکٹر گل حسن کی ہدایات پر منعقد کیا جارہا ہے۔ شرکا کو اپنی دلچسپی کے شعبوں میں صلاحیتوں کے اظہار اور نئی مہارتیں حاصل کرنے کا موقع دیا جائے گا۔

ترجمان نے کہا کہ اس سے تعلیمی اداروں، کاروباری حلقوں اور نوجوانوں کے روابط مضبوط ہوں گے اور سماجی ہم آہنگی، رواداری، قومی یکجہتی اور امن کے فروغ میں مدد ملے گی۔

طلبہ، والدین، نوجوانوں، تعلیمی اداروں کے نمائندوں، کاروباری شخصیات اور عام شہریوں کو شرکت کی دعوت دی گئی ہے۔ حتمی تاریخوں، رجسٹریشن اور شرکت کے طریقہ کار کی تفصیلات جلد جاری کی جائیں گی۔