نصیرآباد میں بجلی کا ٹاور دھماکے سے تباہ، سندھ اور پنجاب کے کئی علاقوں کی سپلائی معطل

ڈیرہ مراد جمالی: نصیرآباد میں نامعلوم افراد نے بجلی کی ہائی وولٹیج ٹرانسمیشن لائن کا ٹاور دھماکے سے تباہ کردیا، جس کے باعث اُچ پاور پلانٹ سے سندھ اور پنجاب کے متعدد علاقوں کو بجلی کی فراہمی معطل ہوگئی۔

ایس ایس پی نصیرآباد اسد خان ناصر کے مطابق ہفتے کی علی الصبح گوٹھ مغل خان بگٹی کے علاقے میں 220 کے وی ٹاور کے نیچے نصب بارودی مواد کا دھماکا ہوا۔ دھماکے سے ٹاور تباہ ہوگیا اور بجلی کی ترسیل رک گئی۔

متاثرہ علاقوں میں شکارپور، رحیم یار خان، صادق آباد، سکھر، لاڑکانہ، جیکب آباد، کشمور اور گڈو شامل ہیں۔ ڈیرہ مراد جمالی کے بعض علاقوں میں بھی بجلی کی فراہمی متاثر ہوئی۔

واقعے کے بعد پولیس اور سکیورٹی فورسز نے علاقے کو محفوظ بناکر شواہد جمع کیے اور سرچ آپریشن شروع کردیا۔ بم ڈسپوزل اسکواڈ نے بھی جائے وقوع کو کلیئر کیا۔

حکام کے مطابق متعلقہ اداروں سے سکیورٹی کلیئرنس ملنے کے بعد تباہ شدہ ٹاور کی مرمت شروع کی جائے گی۔ رپورٹ کے وقت تک کسی گروہ نے دھماکے کی ذمہ داری قبول نہیں کی تھی۔