گلگت بلتستان کے کسانوں کے لیے گندم کے بیج پر 50 فیصد سبسڈی

گلگت: گلگت بلتستان حکومت نے مقامی کسانوں کو 50 فیصد سبسڈی پر تصدیق شدہ گندم کا بیج فراہم کرنے کی اسکیم شروع کردی ہے۔ منصوبے پر تقریباً 14 کروڑ روپے لاگت آنے کا تخمینہ ہے۔

سیکریٹری زراعت، لائیو اسٹاک و ماہی گیری عثمان احمد نے ڈان کو بتایا کہ وزیراعلیٰ امجد حسین کی خصوصی ہدایات پر خطے کے تمام اضلاع میں کسانوں کو معیاری بیج فراہم کیا جائے گا۔

انہوں نے کہا کہ تصدیق شدہ بیج پنجاب سے خریدا جائے گا اور گلگت بلتستان کے کسانوں میں رعایتی قیمت پر تقسیم کیا جائے گا۔ اس اقدام کا مقصد مقامی زراعت کو فروغ دینا اور خطے کو زرعی پیداوار میں خودکفیل بنانے کی کوششوں کو آگے بڑھانا ہے۔

محکمہ زراعت نے رجسٹریشن کے لیے آن لائن پورٹل بھی متعارف کرادیا ہے، تاکہ کسان آسان اور شفاف طریقے سے اسکیم میں شامل ہوسکیں۔

عثمان احمد کے مطابق جو کسان آن لائن پورٹل استعمال نہیں کرسکتے، وہ اپنے ضلع میں ڈپٹی ڈائریکٹر زراعت یا زرعی افسر کے دفتر سے رابطہ کرکے رجسٹریشن کراسکتے ہیں۔