پنجاب کے دریاؤں کا پانی ہر گھنٹے چیک ہوگا، نیا نظام قائم

لاہور: پنجاب میں دریاؤں اور بیراجوں کے پانی کا معیار جانچنے کے لیے 15 خودکار مانیٹرنگ اسٹیشن قائم کردیے گئے ہیں۔ ان مقامات پر ہر گھنٹے پانی کے 14 مختلف پہلوؤں کا تجزیہ کیا جارہا ہے۔

ماحولیاتی مانیٹرنگ سینٹر کے انچارج نور احمد کے مطابق فضائی آلودگی کی طرح پانی کے معیار کا انڈیکس بھی باقاعدگی سے جاری کیا جائے گا۔

انہوں نے بتایا کہ راوی، چناب اور سندھ کے مختلف مقامات پر نگرانی جاری ہے۔ ان میں راوی سائفن، ہڈیارہ ڈرین کا سنگم، ہیڈ مرالہ، خانکی، ہیڈ تریموں اور کالا باغ شامل ہیں۔

ہڈیارہ ڈرین میں آلودگی کے ذرائع جاننے کے لیے 56 مقامات سے نمونے لیے گئے ہیں۔ چاروں موسموں میں تجزیے کے بعد مقامی اور سرحد پار سے آنے والی آلودگی کا تناسب معلوم کیا جائے گا۔

نور احمد کے مطابق ابتدائی مشاہدات میں لاہور کے قریب آلودگی زیادہ ملی ہے، تاہم حتمی نتیجہ تحقیق مکمل ہونے پر سامنے آئے گا۔

رپورٹ کے مطابق صنعتی فضلے کی نگرانی کے لیے واٹر اسکواڈز بھی کام کررہے ہیں، جبکہ لاہور میں گندے پانی کی صفائی کے منصوبوں پر کام جاری ہے۔