پیٹرولیم لیوی کے خاتمے کا مطالبہ، جماعت اسلامی کا مذاکرات کے ساتھ احتجاج جاری رکھنے کا فیصلہ

اسلام آباد: پیٹرولیم لیوی کے خاتمے کے معاملے پر وفاقی حکومت اور جماعت اسلامی کی مذاکراتی کمیٹیوں کا مشترکہ اجلاس 23 اکتوبر کو اسلام آباد میں منعقد کرنے کا فیصلہ کیا گیا ہے۔

وفاقی وزیر منصوبہ بندی احسن اقبال اور جماعت اسلامی کے نائب امیر لیاقت بلوچ کے درمیان ٹیلیفونک رابطے میں مذاکرات دوبارہ شروع کرنے پر اتفاق ہوا۔

لیاقت بلوچ کے مطابق مذاکراتی کمیٹیوں کے اجلاس میں وزیراعظم شہباز شریف اور جماعت اسلامی کے امیر حافظ نعیم الرحمان کے درمیان ملاقات کا شیڈول بھی طے کیا جائے گا۔ تاہم دونوں رہنماؤں کی ملاقات کی حتمی تاریخ ابھی سامنے نہیں آئی۔

نائب امیر جماعت اسلامی نے کہا کہ پیٹرولیم لیوی کے خاتمے کے مطالبے پر 23 اکتوبر کو ملک بھر میں پُرامن احتجاج بھی کیا جائے گا۔ ان کے مطابق عوام کو ریلیف دلانے کے لیے مذاکرات اور احتجاج ساتھ ساتھ جاری رہیں گے۔

جماعت اسلامی نے اس سے قبل بھی پیٹرولیم لیوی کے خلاف احتجاج کیا تھا اور حکومتی کمیٹی کو تجاویز پیش کی تھیں، تاہم فریقین کے درمیان اس معاملے پر حتمی اتفاق نہیں ہوسکا تھا۔

تازہ پیش رفت کے باوجود پیٹرولیم لیوی ختم کرنے یا اس میں کمی کا کوئی نیا فیصلہ سامنے نہیں آیا۔ فی الحال دونوں فریقوں نے مذاکراتی اجلاس منعقد کرنے پر اتفاق کیا ہے۔