لندن میں نواز شریف کی گاڑی پر حملہ، دو نقاب پوش شیشے توڑ کر فرار

لندن: برطانوی دارالحکومت لندن میں سابق وزیراعظم اور مسلم لیگ (ن) کے صدر نواز شریف کی گاڑی پر دو نقاب پوش افراد نے حملہ کرکے اس کے شیشے توڑ دیے۔ واقعہ ایون فیلڈ کے باہر پیش آیا۔

واقعے کے بعد پولیس نے تحقیقات شروع کرتے ہوئے علاقے میں نصب سی سی ٹی وی کیمروں کی فوٹیج اپنی تحویل میں لے لی ہے تاکہ حملے میں ملوث افراد کی شناخت کی جاسکے۔

نواز شریف کی گاڑیوں کے ساتھ پیش آنے والا یہ تیسرا واقعہ بتایا جارہا ہے۔ تاہم تازہ واقعے میں حملہ آوروں کی شناخت اور حملے کی وجہ سے متعلق مزید تفصیلات سامنے نہیں آئیں۔

دوسری جانب نواز شریف نے پشاور میں اسکول کی چھت گرنے کے واقعے پر بھی افسوس کا اظہار کیا ہے۔ انہوں نے اس سانحے کو افسوسناک قرار دیتے ہوئے تعلیمی اداروں کی عمارتوں کی صورتحال پر بات کی۔

نواز شریف کا کہنا تھا کہ پنجاب میں نجی اسکولوں کی حالت بہتر بنانے کے لیے وزیراعلیٰ پنجاب مریم نواز پہلے ہی کام کررہی ہیں۔

پاکستان میں دہشت گردی کی صورتحال سے متعلق گفتگو کرتے ہوئے سابق وزیراعظم نے کہا کہ پاکستان دہشت گردی کے مسئلے کو سمجھتا ہے اور اس کا نوٹس بھی لے رہا ہے۔

اپنی صحت کے بارے میں پوچھے گئے سوال پر نواز شریف نے بتایا کہ ان کی طبیعت ٹھیک ہے اور انہوں نے اس پر اللہ تعالیٰ کا شکر ادا کیا۔