راولپنڈی کرکٹ میچ میں فوجی افسر کی موت کی خبر، اصل حقیقت سامنے آگئی

راولپنڈی: پاکستان اور سری لنکا کے درمیان کرکٹ میچ کے دوران پاک فوج کے ایک افسر کی مبینہ ہلاکت سے متعلق سوشل میڈیا پر گردش کرنے والی خبر کو وزارت اطلاعات و نشریات نے غلط قرار دے دیا ہے۔ وزارت کے فیکٹ چیک کے مطابق متوفی کا نہ تو پاک فوج سے تعلق تھا اور نہ ہی وہ واقعے کے وقت کرکٹ اسٹیڈیم میں موجود تھا۔

وزارت اطلاعات کے فیکٹ چیک اکاؤنٹ نے سماجی رابطے کی ویب سائٹ ایکس پر وضاحت جاری کرتے ہوئے بتایا کہ محمد فاروق نامی شخص پاکستان کرکٹ بورڈ کا ملازم تھا اور اس کی موت دل کا دورہ پڑنے کے بجائے بجلی کا کرنٹ لگنے سے ہوئی۔

اس سے قبل سوشل میڈیا پر ایک صحافی کی جانب سے یہ دعویٰ سامنے آیا تھا کہ راولپنڈی کرکٹ اسٹیڈیم میں پاکستان اور سری لنکا کے میچ کے دوران 50 سالہ محمد فاروق اچانک بے ہوش ہوگئے تھے۔ دعوے میں کہا گیا تھا کہ انہیں ریسکیو 1122 کے ذریعے بے نظیر بھٹو اسپتال منتقل کیا گیا، جہاں وہ جانبر نہ ہوسکے۔

اسی پوسٹ میں یہ بھی کہا گیا تھا کہ محمد فاروق پاک فوج سے وابستہ تھے اور اسلام آباد کی ایک سیکیورٹی ایجنسی میں تعینات تھے۔ تاہم وزارت اطلاعات نے ان معلومات کو مسترد کرتے ہوئے واقعے سے متعلق پولیس اور اسپتال کے ریکارڈ کا حوالہ دیا۔

وزارت کی جانب سے شیئر کی گئی ایف آئی آر کے مطابق محمد فاروق کی عمر تقریباً 60 سال تھی اور وہ اپنے گھر میں بجلی کا پلگ چیک کررہے تھے کہ انہیں کرنٹ لگ گیا۔ واقعے کے بعد اہل خانہ نے ریسکیو 1122 سے رابطہ کیا اور انہیں اسپتال منتقل کیا گیا۔

فیکٹ چیک میں بتایا گیا کہ اسپتال کے ریکارڈ میں بھی موت کی وجہ بجلی کا کرنٹ لگنا درج ہے۔ وزارت اطلاعات کے مطابق محمد فاروق میچ کے دوران اسٹیڈیم میں موجود نہیں تھے اور ان کی ملازمت کا کرکٹ بورڈ سے تعلق ہونے کے باوجود اس واقعے کا میچ سے کوئی تعلق نہیں تھا۔

وزارت اطلاعات نے واضح کیا کہ ایک الگ واقعے کو کرکٹ میچ سے منسلک کرکے پیش کرنا گمراہ کن ہے۔ حکام نے شہریوں سے اپیل کی کہ کسی بھی خبر، بالخصوص اموات اور حساس واقعات سے متعلق معلومات، سوشل میڈیا پر شیئر کرنے سے پہلے ان کی تصدیق ضرور کریں۔