اسرائیل کا انتخابات کے دن مغربی کنارے کے تمام داخلی و خارجی راستے بند کرنے کا اعلان
فلسطینی کارکنوں کی آمدورفت پر پابندی، غزہ میں یونیورسٹی سمیت مختلف مقامات پر اسرائیلی حملوں میں 7 افراد جاں بحق
اسرائیل نے 27 اکتوبر کو عام انتخابات کے دن مقبوضہ مغربی کنارے کی تمام زمینی گزرگاہیں بند رکھنے کا اعلان کردیا ہے۔
اسرائیلی فوج کے مطابق فلسطینی کارکنوں کو مغربی کنارے اور وادیٔ اردن کی اسرائیلی بستیوں اور صنعتی علاقوں میں کام کے لیے آنے جانے کی اجازت بھی نہیں ہوگی۔
یہ اعلان الخلیل میں اسرائیلی کارروائی کے بعد سامنے آیا، جہاں تقریباً دو ہزار رہائشی بے گھر ہوئے ہیں۔ اسرائیلی وزیر دفاع اسرائیل کاٹز نے کہا کہ کارروائی مکمل ہونے تک انہیں واپس آنے کی اجازت نہیں دی جائے گی۔
فلسطینی اتھارٹی نے متاثرہ شہریوں کے تحفظ کے لیے اسرائیل پر عالمی دباؤ ڈالنے کا مطالبہ کیا ہے۔ اسرائیلی فوج نے مختلف علاقوں میں تقریباً 40 مشتبہ افراد کو حراست میں لینے کا بھی بتایا۔
دوسری جانب غزہ شہر کی ایک یونیورسٹی پر اسرائیلی حملے میں تین افراد جاں بحق ہوگئے۔ یونیورسٹی کے عملے اور مقامی اسپتال نے ہلاکتوں کی اطلاع دی۔
غزہ کے شہری دفاع کے ترجمان محمود بصل کے مطابق خان یونس میں دو، دیر البلح میں ایک اور شمالی غزہ میں ایک شخص بھی اسرائیلی حملوں میں جاں بحق ہوا۔
اسرائیلی انتخابات میں وزیراعظم بنیامین نیتن یاہو کو نفتالی بینیٹ، یائر لاپید اور گادی آئزنکوٹ سمیت نمایاں حریفوں کا سامنا ہے۔
