مکہ اور جدہ سمیت 4 سعودی شہروں میں ہنگامی الرٹ، شہریوں کو محفوظ مقامات پر جانے کی ہدایت

سعودی عرب کے محکمہ شہری دفاع نے مکہ مکرمہ، جدہ، طائف اور ینبع میں ممکنہ خطرے کا ہنگامی الرٹ جاری کیا، تاہم چند منٹ بعد خطرہ ٹلنے کا اعلان کرتے ہوئے انتباہ واپس لے لیا۔

ابتدائی پیغام میں متعلقہ علاقوں کے رہائشیوں کو فوری طور پر قریبی محفوظ مقام پر منتقل ہونے کی ہدایت کی گئی تھی۔ الرٹ ختم ہونے کے بعد بھی حکام نے شہریوں سے محتاط رہنے اور سرکاری ہدایات پر عمل کرنے کو کہا۔

تازہ پیش رفت میں سعودی قیادت میں قائم اتحاد نے بتایا کہ حوثیوں کی جانب سے طائف اور ینبع کی طرف داغے گئے دو بیلسٹک میزائل روک کر تباہ کردیے گئے۔ رائٹرز کے مطابق شہری دفاع نے ابتدائی انتباہ کے تقریباً دس منٹ بعد خطرہ ٹلنے کا اعلان کیا۔

حکام نے میزائلوں اور ڈرونز کو روکنے کی کارروائیوں سے متعلق تصاویر اور معلومات سوشل میڈیا یا دیگر ذرائع پر شیئر کرنے کے خلاف قانونی تنبیہ بھی دہرائی۔

ایکسپریس کی ابتدائی رپورٹ میں الرٹ کی وجہ یا کسی جانی و مالی نقصان کی تفصیل شامل نہیں تھی۔