ٹرمپ نے روس اور چین کے ساتھ بڑی بیٹھک پر آمادگی ظاہر کردی

واشنگٹن: امریکی صدر ڈونلڈ ٹرمپ نے روس اور چین کے سربراہان کے ساتھ مشترکہ اجلاس میں شرکت کے لیے آمادگی ظاہر کردی ہے، جس میں عالمی سلامتی اور جوہری ہتھیاروں کے خاتمے جیسے اہم معاملات زیر بحث آسکتے ہیں۔

ڈونلڈ ٹرمپ کا کہنا ہے کہ وہ روسی صدر ولادیمیر پیوٹن اور چینی صدر شی جن پنگ کے ساتھ سہ فریقی اجلاس میں شریک ہونے کے لیے تیار ہیں۔ ان کے مطابق اس ممکنہ ملاقات میں جوہری ہتھیاروں کے خاتمے کے معاملے پر توجہ دی جاسکتی ہے۔

اس سے قبل روسی صدر ولادیمیر پیوٹن نے یوکرین میں جاری جنگ کے خاتمے کے لیے آئندہ ماہ امریکی اور چینی صدور کے ساتھ سربراہی اجلاس منعقد کرنے کی تجویز پیش کی تھی۔

تینوں عالمی طاقتوں کے سربراہان کی ممکنہ ملاقات اہم سفارتی پیش رفت ہوسکتی ہے، تاہم اجلاس کی تاریخ، مقام اور حتمی ایجنڈے سے متعلق ابھی تفصیلات سامنے نہیں آئیں۔

واضح رہے کہ امریکا، روس اور چین عالمی سلامتی اور جوہری معاملات میں اہم کردار رکھتے ہیں۔ ایسے میں تینوں رہنماؤں کے درمیان براہ راست مذاکرات عالمی سفارت کاری کے حوالے سے خاص اہمیت رکھتے ہیں۔